La scola dad Igis tutga tar ina da las grondas dal chantun. Da la scoletta fin la sisavla classa datti 400 scolaras e scolars. Cler che er il vitg dad Igis è in grond vitg cun uschè blers scolars: Radund 3'700 persunas vivan en il vitg, igl è pia bainbaud aglomeraziun da Landquart (4'900 abitantas ed abitants). E tras quai ch'il vitg è uschè grond datti la dumonda sche Igis è anc in vitg u betg pli.
Jau pens ch'ina emna da project è fitg bel per ils scolars sco era la magistraglia. I dat er ina colliaziun tranter las singulas classas, tge ch'i n'ha uschiglio betg.
In project per il vitg
Tgi abitescha en mes vitg? Tge professiuns han quellas persunas? Tar la grondezza dal vitg n'èsi betg evident che mintgin enconuscha anc mintgin. Quai vul la scola midar cun il project dal «Vitg en il vitg». En 35 workshops vegnan preschentadas differentas clamadas da las persunas ch'abitan ad Igis, uschia p. ex. scrinari u electricista. Finamira è da colliar pli fitg ina cun l'autra tuttas persunas dal vitg tras il project da scola.