Avant dus mais ha l'uniun da las baselgias en il Partenz «Kirchen helfen – Prättigau» organisà per 47 fugitivas e fugitivs in transport dal cunfin polac en il Grischun. Quellas persunas fugidas han tuttas chattà suttetg tar famiglias en il Partenz, pensums organisatorics ha l'uniun surprendì. Uss tschertgan diversas famiglias ucranesas atgnas quatter paraids ed ina lavur per daventar pli independentas, ha declerà Walter Bstieler da l'uniun envers il schurnal regiunal da SRF.
Chattar job ed abitaziun è ina gronda sfida
Far in pass en l'independenza cun chattar in'atgna abitaziun ed in job saja tut auter che simpel, di il diacon social. Il martgà d'immobiglias saja sitg. Er chattar in job saja ina sfida, cunquai che la gruppa da fugitivs è per gronda part dunnas cun uffants, ston las dunnas per part anc organisar la tgira d'uffants per insumma pudair lavurar. Uschia che las bleras na possian dad oz sin damaun anc betg bandunar las famiglias ospitantas. Walter Bstieler e l'uniun speran dentant ch'ellas possian cun il status da protecziun S – che cumpeglia er ina summa fixa da daners e contacts tar l'uffizi social – s'organisar zic e zic e bajegiar si ina tscherta independenza. L'uniun «Kirchen helfen – Prättigau» sa retira in pau dal project, els sajan bain anc qua sco persunas da contact e possian gidar punctunal, ma betg pli uschè intensiv sco l'entschatta.
Ch'els hajan sutschazegià la situaziun ord spira solidaritad na lascha Walter Bstieler betg valair. I saja cler che l'entir project saja cumplex, ma el è persvadì che l'integraziun gartegia cun pazienza e perseveronza.