Siglir tar il cuntegn

Header

audio
Cuira: Inauguraziun da la nova halla da trenament sin l'Obere Au
Or da Actualitad dals 23.02.2022.
laschar ir. Durada: 2 minutas 54 Secundas.
cuntegn

Inauguraziun Cuira ha la nova halla da trenament «Obere Au»

La halla da trenament «Obere Au» a Cuira è vegnida inaugurada mesemna uffizialmain. Ell'è ina part dal project «Eisball» ch'il suveran da Cuira ha approvà il 2018 cun gronda maioritad. Sper la halla tutgan tschintg plazzas da pastg natiral ed in bajetg da tribuna tar il project. Trais dals tschintg plazs da pastg natiral èn vegnids construids ensemen cun la halla. Quella serva a trenaments sin glatsch e pastg. Glindesdi proxim vegn la halla prendida en funcziun e per ils 11 da zercladur è planisà in di da las portas avertas per la populaziun.

Blers fatschas cuntentas

Durant l'inauguraziun han radund 100 persunas – ord la politica, cultura, dentant era famiglias – dastgà far in gir tras las localitads e contemplar tut las stanzas da la halla da glatsch. Era ils trenaders da las uniuns ch'èn avisadas sin ina halla da glatsch – sco per exempel l'EHC u l'uniun da glatsch – han dastgà visitar lur nov dachasa. Bino Heinz, il scheftrenader dals uffants tar l'EHC, è fieu e flomma per las localitads.

Nus avain vesì egls traglischants tar ils uffants.
Autur: Bino Heinz trenader EHC

La halla ha custà radund 14 milliuns francs. Per Urs Marti, il president da la citad da Cuira, è la halla il prim grond pass da la renovaziun dals implants da sport a Cuira.

Tar l'infrastructura da la halla tutgan:

  • Plazza da glatsch variabla (60m x 26m resp. 60m x 30m)
  • 25 gardarobas
  • Stanza d'atletica ed ina sala da gimnastica
  • In tschancun da sprint
  • Stanza da sanitad
  • Tribuna cun 276 plazzas da seser
  • Duas stanzas da sesida ed ina stanza pli gronda per events

L'infrastructura po vegnir reservada via in sistem online. Cun l'avertura da la nova halla da trenament vegn il plaz da glatsch existent dadora, serrà suenter l'enviern 2021/2022. Il patinar public vegn purschì en l'avegnir per gronda part en la nova halla da trenament. Ils bigliets datti da cumprar a l'automat ed a partir dal zercladur pon ins er affitar patins.

RTR actualitad 17:00

Artitgels legids il pli savens