Avant set onns han ils cusrins Roman Flepp da Mustér e Valentin Manhart da Walenstadt scuvrì l'app Instagram – ed han ord spir plaschair cumenzà a metter online las fotografias ch'els han fatg durant lur turas. Pass per pass han els gì adina dapli followers. Oz tutgan els cun lur bunamain 240'000 followers tar ils pli gronds influencers en Svizra. Ed uschia pon els oz er viver da lur plattafurma sin las medias socialas. Els gudognan raps durant lur turas cun far reclama p.ex. per ina destinaziun turistica u ina marca da vestgadira dad outdoor. Per els cleramain in job da siemi.
Cun lavurar cun differentas marcas e destinaziuns turisticas, han els constatà ch'i dat anc ina massa potenzial en la branscha. Uschia han ils dus students decidì da fundar lur atgna agentura. A maun da quella surprendan els ils profils da lur clients e fan ils posts per els u fan cussegliaziuns e workshops. Lur agentura na porscha betg be lavur ad els dus mabain er a trais ulteriurs collavuraturs.
Malgrà lur success èn Roman Flepp e Valentin Manhart era conscients dal fatg che la branscha da las medias socialas è enorm volatila. Betg mo perquai resta lur prioritad adina da far lur masters e d'avair en satg ina «dretga» furmaziun.