Plirs chantuns han ils ultims dis precisà u reducì il temp da quarantina, en ils blers vala be pli ina quarantina da 7, enstagl 10 dis. Entras las midadas en ils auters chantuns, ha er il Grischun decis da precisar sias reglas, ha dentant lura publitgà in document fauss. Il sbagl è uss però curregì ed i valan las reglas ch'il chantun ha sin sia pagina d'internet, ha ditg il manader dal stab da crisa dal Grischun, Martin Bühler envers RTR.
Infumraziuns davart la quarantina
Tge vala en il Grischun?
En general pon ins dir simplifitgà: ir en quarantina ston be pli persunas, che n'èn betg vaccinadas, n'èn betg prontas da sa laschar testar, ed han in cas da corona en il stretg conturn. Vitiers vegnan uffants da scola che n'han betg gì corona ils ultims quatter mais. I valan dentant reglas specificas per mintga cas.
Per l'ina datti quellas persunas che na ston insumma betg pli ir en quarantina, sch'ellas n'han nagin sintoms:
- Persunas guaridas aifer ils ultims quatter mais
- Persunas creschidas vaccinadas aifer ils ultims quatter mais (duas vaccinaziuns, u booster)
Per l'autra datti persunas che pon substituir la quarantina cun tests regulars, vul dir tests repetititvs mintga segund di:
- Persunas creschidas vaccinadas u guaridas avant dapli che quatter mais
- Persunas da contact betg vaccinadas, betg guaridas, ch'han gì contact oraifer da l'atgna chasada
- Persunas che sa participeschan als tests da manaschi repetitivs dal Grischun
Terminar quarantina anticipadamain
Dentant er las persunas che ston ir en quarantina, pon reducir quella da 10, sin 7 dis. Quai sch'ellas pon cumprovar suenter 7 dis in test da PCR u test svelt d'antigens negativ.
Isolaziun resta tar 10 dis
Il temp d'isolaziun resta dentant tar 10 dis. Cun questa midada duai l'effect da la quarantina sin la societad e l'economia vegnir levgià. Ed ins veglia evitar stretgas da persunal pervia da la varianta omicron che sa derasa en il mument fermamain.