L’iniziativa da tgira giauda gronda simpatia en la populaziun. Quai mussan differentas retschertgas ch’èn vegnidas fatgas las davosas emnas. La pussaivladad ch’i pudess dar in Gea ils 28 da november è pia tuttavia dada. E lura? Lura sto il Parlament federal anc ina giada sa fatschentar cun la materia. La dumonda è simplamain: È la maioritad da las parlamentarias e dals parlamentaris propi pronta da vegnir pli fitg encunter als iniziants che quai ch’i han fatg en la cuntraproposta indirecta?
Locher Benguerel: «Iniziativa è lianta»
Per la cussegliera naziunala Sandra Locher Benguerel è cler: Datti in Gea a l'iniziativa da tgira, lura èn Cussegl federal e parlament obligads da proponer e realisar las pretensiuns dals iniziants. I dovria lura mesiras che megliureschian cleramain las cundiziuns da lavur e las perspectivas professiunalas da las persunas che lavuran en il sectur da la tgira. Quai na saja ussa betg part da la cuntraproposta.
Cun quella haja il Parlament federal gia preschentà ina buna basa sin la quala ins possia lura concretisar ed agiuntar quels puncts ch'il suveran giavischia cun ses votum a l'urna, di la politichera socialdemocrata. Anc ditg discutar vi e nà, na stoppian ina lura era betg pli.
In zic auter vesa quai il cusseglier dals chantuns liberaldemocratic Martin Schmid. In Gea a l'iniziativa munti era che la cuntraproposta ch'il Parlament federal haja elavurà na saja betg bun'avunda per ina maioritad da las votantas e dals votants. E qua saja cler ch’il parlament stoppia anc ina giada sa fatschentar cun la chaussa. Dentant betg mo il Parlament federal, mabain era la Conferenza svizra da las directuras e dals directurs chantunals da sanadad. Ed era en il Grischun stoppia il Cussegl grond sa fatschentar cun la dumonda tge consequenzas ch’il Gea a l’iniziativa haja per il chantun.
Schmid: «Parlament federal decida realisaziun»
Fatg saja numnadamain che bleras parts dal sistem da sanadad sajan en la cumpetenza dals chantuns. Da quai saja la maioritad dal Parlament federal era stada pertscherta cura ch'ella haja elavurà la cuntraproposta. Ch'il Parlament federal vegnia suenter in Gea a l'iniziativa ussa simplamain a prender davent quellas cumpetenzas als chantuns e dictar tut da Berna, saja pauc realistic.
Nua ch’i giaja per tariffas e sustegns, là sajan era ils chantuns dumandads. Gia oz fixeschian ils chantuns e las cassas da malsauns las tariffas. Sumegliant tar la Spitex. La gronda sfida vegn ad esser da guardar co ins vul reglar quai ed era sch’ils pajapremias sajan pronts da pajar dapli per la lavur dal persunal da tgira.
Ch'ils chantuns stoppian tar in Gea a l'iniziativa natiralmain era agir ed adattar lur leschas, è per Sandra Locher Benguerel cler. Quai saja era l'intent da l'iniziativa. Ella è perfin da l'avis che lezza obligheschia il Cussegl federal ed il Parlament federal da procurar ch'ils chantuns fetschian quai era. Per exempel cun l’instrument dal contract collectiv da lavur. Il GAV possia vegnir definids uschia ch’i dettia quell’obligaziun. La realisaziun saja lura chaussa dals chantuns.
Ella saja dentant da buna speranza ch'il Parlament federal chattia ina buna schliaziun. La fin finala saja la finamira ch'i dettia in provediment da la sanadad segir e d’auta qualitad. Baud ni tard sajan nus tuts visads vi sin quel.