Tgenin è Voss favurit per il pled da l'onn 2020?
Inditgai Voss pled en il formular. Bunamain mintga pled vegn examinà dals linguists e da las linguistas da la ZHAW ed ha la schanza da vegnir sin la glista lunga. Quella vegn lura preschentada ad ina giuria tschernida da la Lia Rumantscha che elegia il pled da l'onn rumantsch. Publitgà vegn il pled ils 8 da december.
Criteris
- Nagins nums da marca u da persunas (p. ex. Donald Trump u M-Budget).
- I vegn tschertgà il pled che ha muventà il pli fitg la Svizra rumantscha e betg il pli bel pled.
- D'avantatg è sch'il pled ha in connex regiunal u cun la Svizra.
Or da var 70 pleds datti trais victurs
Igl è il segund onn che l'elecziun dal pled da l'onn rumantsch stat sut il timun da la ZHAW e la Lia Rumantscha. En mintga part linguistica da la Svizra datti ina giuria che elegia ord ina glista lunga da 70 fin 80 pleds en pliras discussiuns e votaziuns ils trais pleds victurs. La glista lunga mettan ils experts da la ZHAW ensemen or d'analisas da var otg milliuns texts cun 1,6 milliardas pleds or da 360 differentas funtaunas sco er or da las propostas da la populaziun e dals commembers da la giuria.
La Lia Rumantscha è responsabla per la giuria en la Svizra rumantscha. A questa sa participeschan diesch persunas. Ellas represchentan ils divers idioms, derivan da differentas spartas e funcziuns ed èn ina buna maschaida da genders e vegliadetgna.
Fin ils 3 da december pudais Vus inoltrar propostas. Mardi, ils 8 da december vegnan lura preschentads ils 12 pleds da l'onn, per mintga lingua naziunala tenor il principi dal prim, segund e terz.