Atgnamain è l’idea da far in podcast per emprender rumantsch naschida entras in auter podcast che Sandro Derungs e Martin Stebler han fatg il passà. Durant lezzas episodas è il rumantsch adina puspè stà in tema. In di ha Sandro Derungs lura vulì guardar qunats podcasts rumantschs ch’i dettia insumma ed uschia constatà ch’i na dettia nagin podcast che sa focusescha sin l’instrucziun dal rumantsch.
Nus avain tschernì il pled «lumpazi» perquai ch’igl è in pled che mora ora. Pleds sco quels vala da mantegnair.
Uschia han els cumenzà a producir cuntegn en quella direcziun. Il co-iniziant Martin Stebler ch’ha da far nagut cun il rumantsch è il scolar, Sandro Derungs il scolast. En mintga episoda sa focuseschan els sin in scenari concret. Silsuenter mussa Sandro Derungs tut ils pleds e construcziuns ch’èn nizzaivlas en ina tala situaziun. Sper il podcast tgiran els in chanal d’instagram, nua ch’els tegnan up-to-date lur auditurs. E per quels ch’i na basta betg da be tadlar, mettan els a disposiziun cartinas da vocabulari.
Nagin linguist, mabain motivatur
Sandro Derungs n'ha betg studegia linguistica e n’è era betg scolast. Magari sappia dar in u l’auter sbagl linguistic, ma quai na saja betg uschè tragic, damai ch’el vul cunzunt transmetter savida da basa, divertir e fa gust sin dapli. Sch’i sa tracta d’in med d’instrucziun u da divertiment sa mintgin decider per sasez. Ideal fiss ch’ina persuna survegn uschè bler gust cun tadlar il podcast ch’ella emprendess activamain rumantsch e frequentass lura in curs professiunal da rumantsch.
