Siglir tar il cuntegn

Header

Legenda: MAD
cuntegn

Integraziun en Grischun Fugitivs gidan fugitivs

Per pudair integrar meglier novs fugitivs sa concentrescha il chantun Grischun en l'avegnir sin persunas ch'han fatg atgnas experientschas da fugia e ch'èn vegnidas natiers per exempel da l'Eritrea, l'Afghanistan, la Somalia u la Sri Lanka. Talas persunas numna il chantun «construiders da punts».

«Construiders da punts»

I sa tracta da 13 dunnas e 12 umens ch'èn sezs stads fugitivs ed èn uss integrads en Svizra. Els duain gidar novs fugitivs da vegnir pli svelt en contact cun la populaziun indigena u per exempel mussar co ins sa emprender pli spert il linguatg local. Lura vai er per dumondas praticas, sco Felix Birchler dal post d'integraziun dal chantun explitgescha. Sco in fugitiv ha per exmpel chattà in'abitaziun e sto s'installar na sa el betg nua s'annunzia sin vischnanca u co il sistem da rument funcziuna.

Da mussar ad in fugitiv talas caussas praticas surprendia lura ina da quellas persunas ch'il chantun numna «construiders da punts». Las persunas èn vegnidas scoladas specificamain. 25 persunas scoladas da frestg han pudì retschaiver dacurt la gratulaziun per lur nova incumbensa da cusseglier guvernativ Peter Peyer.

Ord l'archiv – Ils novs vischins da Laax

Suenter che la vischnanca aveva cumbattì durant quasi trais onns cunter il center transitoric per requirents d’asil, èn ils emprims fugitivs arrivads il favrer 2015 a Laax. Là han els prendì dimora en l’anteriur hotel da trais stailas «Rustico». Turists e fugitivs! Per quels da Laax insatge nunpussaivel. Il cas ha bittà undas fin avant dretgira federala. E la finala han ils da Laax stuì capitular. In Cuntrasts dal 2015 mussa da la situaziun da lez temp. Lura vivevan var 100 persunas dad 11 naziuns en quel center da requirents d'asil.

video
Ils novs vischins da Laax, part I
Or da Cuntrasts dals 22.12.2015.
laschar ir
video
Ils novs vischins da Laax, part II
Or da Cuntrasts dals 30.12.2015.
laschar ir

RTR novitads 09:00

Artitgels legids il pli savens

Scrollar a sanestra Scrollar a dretga