Siglir tar il cuntegn

Header

audio
Divertir, polarisar e svegliar – la nova satira da Luca Maurizio
Or da Actualitad dals 12.01.2022.
laschar ir. Durada: 4 minutas 2 Secundas.
cuntegn

Klibühni Cuira Premiera «Fake News» da Luca Maurizio

Mardi saira ha il program da satira «Fake News – Herden auf Erden» gì premiera en la Klibühni a Cuira. Il program satiric tschenta la dumonda: «A tgi as po insumma anc crair?»

È Angela Merkel in ailien reptiloid? Procura la vaccinaziun encunter corona disfuncziuns erectilas? Ha l’industria solara procurà il stgaudament dal clima or da raschuns strategicas da marketing? A tgi sai jau anc crair? Quai sa dumonda l’uman confus – a tgi vuless jau anc crair? La confidanza en la muntanera è vegnida pli e pli pitschna. Ins vegn educà critic, ins è unic – nagin na vul pli esser ina nursa obadaivla. Il concept per ses program ha Luca Maurizio gì gia avant la pandemia, el haja dentant adattà quel. Corona saja uschè actual, ch’ins na possai betg ignorar questa tematica.

Pli baud vegnivan quels che pretendevan insatge intelligent brischads. Oz poss ti raquintar la pli gronda tuppadad, e chattas tuttina anc in pèr followers en la rait.
Autur: Luca Maurizio satiricher

Il model dal triep

Ma sch’igl ans plascha u betg, sur mellis onns ha la natira tschernì per yaks, lufs, delfins, furmias ed umans il model da success: il triep. Cun umor raffinà inscenescha Luca Maurizio sias enconuschientschas dal triep e mussa visiuns bizaras, visiuns concepidas da persunalitads grischunas che duessan midar la direcziun dals trieps, e restabilir la confidenza en la roscha.

Satira – nagins tabus

Luca Maurizio accentuescha ch’el na fetschia betg comedy mabain satira. Ses program duess divertir mabain era far ponderar, mintgatant stoppia era far in zic mal. Per el na dettia nagins cunfins tematics tar la satira, i saja adina ina dumonda sco ch’ins tractia tschertas tematicas, ins stoppia far quai cun respect.

Luca Maurizio

Avrir la box Serrar la box

Ha passentà si'uffanza a Malögia en la Bregalia. L'anteriur scolast primar e secundar viva cun sia dunna ed ils trais uffants a Tumegl en Tumleastga. El è satiricher, cabarettist, cantautore ed um da chasa. Sias passiuns èn musica e teater, lavurs cun lain e crap e la lavur en iert.

  • 2021 ha el gudagnà il premi da litteratura grischun per «sias chanzuns poeticas e sia satira subtila da nossa societad».
  • 2020 ha el cun ses project da cabaret «Fake News» gudagnà la concurrenza da project per artists professiunals dal chantun Grischun.

Actualmain è el sin turnea cun ses program satiric «Fake News – Herden auf Erden».

RTR actualitad 17:00

Artitgels legids il pli savens