Las recumandaziuns da las baselgias pertutgant la votaziun «lètg per tuts» èn differentas. La baselgia refurmada è la pli liberala ed è per la lètg per tuttas e tuts.
La baselgia refurmada – Gea
Malgrà ch'il resultat da la votaziun na pertutga betg la baselgia, ma per blers pèrins tutga, per il maridar civil, era las nozzas en baselgia tiers. E quella pussaivladad veglia la baselgia refurmada era porscher a pèrins omosexuals, di Matthias Zeindler da la baselgia refurmada Berna Jura Soloturn envers SRF:
Jau na faschess nagina differenza tar ina nozza d'in pèrin omosexual.
La baselgia catolica – na, però
Auter è quai tar la baselgia catolica. L’uvestg da Cuira, Joseph Maria Bonnemain, ha ditg en l’emissiun Club da SRF, ch'i haja plaz per tuttas differentas furmas da partenadis. Ma igl è impurtant a l’uvestg da Cuira che la lètg tranter um e dunna vegnia protegida spezialmain.
La raschun daco che la baselgia catolica di dentant Na tar la votaziun è, ch'els èn da l'opiniun ch'in uffant dovria in bab ed ina mamma e ch'adoptar uffants u la donaziun da sems na saja nagina opziun:
Avant che nus lubin tut stuain nus sa fatschentar cun las dumondas eticas.
Las baselgias independentas – Na
Era las baselgias independentas èn cunter quella votaziun. Oz beneventian las baselgias independentas persunas omosexualas, da benedir lètgs tranter dus umens u duas dunnas, vegni per els dentant betg en dumonda, di Christian Haslebacher, suprastant da l'uniun tetgala da las baselgias independentas svizras envers SRF:
La bibla s’exprima en divers contexts istorics sco era culturals adina critic envers omosexuals. E quai fa grev a nus da betg sa tegnair vidlonder.
Pia, las baselgias n’èn betg tuttas da la medema opiniun. Entant ch'i vegn per las baselgias independentas betg en dumonda da laschar maridar pèrins omosexuals, vegn la baselgia refurmada a porscher quella pussaivladad.
Adatg cun sa referir a studis
Tar votaziuns sa refereschan ils aderents sco era ils adversaris gugent a studis. Ma i saja da dar adatg cun sa referir memia spert a quels, di l’anteriura professura per scienza d’educaziun, Margrit Stamm, envers SRF. Gist sur dal svilup d’uffants che creschan si tar in pèrin omosexual dettia blers studis. Sin il resultat stoppian ins dentant guardar cun in egl critic, di Margrit Stamm.
In problem general tar studis saja ch'ils retschertgader hajan savens gia ina idea co il resultad duess vesair ora. Sco scientist u scientista stoppian ins esser conscient da quai ed era leger studis lasuenter.