Siglir tar il cuntegn

Header

cuntegn

La previsiun Nagina plievgia en vista

En il Grischun èsi sitg e quai resta ils proxims dis uschia. Enfin la fin dal mais n'è nagina plievgia en vista. In sguard en las datas meteorologicas mussa: Uschè pauca plievgia sco quest onn n'hai dapi 20 onns betg pli dà il mars.

Gia dapi in mais plovi en il Grischun – sche insumma – be en pitschnas dosas homeopaticas. Dentant n'èn betg tuttas regiuns pertutgadas tuttina ferm. Ins po distinguer tranter la part dal sid ed il rest dal chantun Grischun, uschia Nicole Glaus da SRF Meteo.

En las regiuns Mesauc, Bregaglia e Puschlav hai dà l'entir enviern pauca naiv e plievgia.
Autur: Nicole Glaus SRF Meteo
audio
Lunga fasa senza plievgia – e nagina en vista
ord Actualitad dals 22.03.2022.
laschar ir. Durada: 3 minutas 29 Secundas.

Mars extraordinari sitg

Sch'ins cumpareglia las duas staziuns da mesirar Grono e Cuira, che sajan represchentativas per il Grischun, lura è la situaziun extraordinaria: Il mais mars n'era dapi 20 onns betg pli uschè sitg sco quest onn. Tenor Nicole Glaus haja era gia dà pauca plievgia u naiv. Ma uschè pauca plievgia u naiv sco quest onn, pia quasi nagina, quai n'haja betg dà ils ultims 20 onns.

video
Meteo da Telesguard (21.03.2022)
Or da Telesguard dals 21.03.2022.
laschar ir. Durada: 40 Secundas.

Memia pauca naiv

En las regiuns sur 1'500 meters sur mar hai anc dà naiv da quel temp da l'onn. Dentant haja actualmain en tuttas regiuns radund in terz pli pauca naiv che normalmain. Quel quantum vegnia lura a mancar tar la bunatscha, cura che la naiv lieua.

audio
Sitgira en il GR: Situaziun da las auas anc betg alarmanta
ord Actualitad dals 22.03.2022.
laschar ir. Durada: 4 minutas 12 Secundas.

Ina mancanza d'aua na dettia actualmain betg. Tenor experts sajan l'umiditad dal terren ed il livel da l'aua sutterrana anc sin in livel normal ma sbassant. Sch'i dettia vinavant nagina plievgia sappia quai pli tard la primavaira esser in problem. Era l'agricultura na discurria anc betg d'ina situaziun precara. En la Val dal Rain Grischuna hajan ins dentant per part stuì cumenzar a bagnar. Per part saja il terren er memia sitg per semnar.

Provediment d'aua segirà

Il provediment d'aua saja en mintga cas segira, tenor Yves Quirin da l'Uffizi per la natira e l'ambient dal Grischun. Tenor la lescha federala stoppia mintga vischnanca segirar il provediment d'aua sin in livel minimal per la populaziun. Vischnancas che retirian l'aua da l'aua sutterrana na stoppian insumma betg far quitads. L'aua sutterrana reageschia fitg letargic sin sitgiras. Fin ch'il provediment fiss periclità stoppia esser sitg permanent sur plirs onns.

En vischnancas che retirian lur aua da funtaunas saja pussaivel ch'i dettia stretgas. I dependia quant profundas che las funtaunas sajan. En quels cass stoppian las vischnancas reagir cun mesiras da spargnar aua, sco per exempel metter giu bigls u la supplica da betg pli lavar l'auto. Per il mument na dettia anc nagin basegn da mesiras.

Artitgels legids il pli savens