Il sustegn dal Grischun cumpiglia ina contribuziun chantunala da 3,7 milliuns francs per ils onns 2022 e 2023, ultra da quai survegna il CSEM ina contribuziun da maximalmain 600’000 francs en il rom da la Nova politica regiunala da la Confederaziun. Quella vegn pajada mintgamai per la mesadad da la Confederaziun e dal chantun.
Approvà lavurs vid la Ponte Lant
Per far pli segira la via chantunala sur Pian San Giacomo, en il Mesauc – prevesa il chantun d'investir radund 2,9 milliuns francs. La via datiers dal Ri da Lant vegnia adina puspè curclada da glitta e glera, scriva il chantun. Ed il 2008 saja la via stada serrada plirs dis, suenter in ferm urizi.
Uss planisescha il chantun da spustar la via, e la punt da Lant 18 meters aval. Vitiers vegn la capacitad idraulica da l'aual augmentada en il sectur da la punt.
Dapli resursas per cumbatter la violenza a chasa
La regenza grischuna auza per 50% las resursas da persunal dal Post da coordinaziun violenza a chasa dal chantun. Il post a numnadamain survegnì dus novs puncts centrals da svilup –«Metter en pe il management chantunal da smanatschas» e «Prevenziun e cumbat da violenza envers dunnas e violenza a chasa».