Quella fatscha sumeglia tai pli e pli fitg, di la glieud a Domat magari a mai.
Dapi tschintg onns na stat nagina statua da Nepomuk pli en la Via nova a Domat. Quella ch'era là, è vegnida destruida entras in accident. 10 onns ha la figura passentà en quest lieu. Creà ella aveva il sculptur da Domat Benno Willi. En blers tschients uras da lavur aveva el dà vita al bloc da crap, suenter avair retschertgà durant in lung temp, co il Nepomuk da Domat stoppia vesair ora. In accident ha dentant ruinà la statua. Quella è crudada per terra e sfratgada.
Per Benno Willi ha quai muntà anc ina giada semetter vid la lavur e far ina copia da la copia. Munta che Benno Willi è ussa puspè durant onns vid la medema statua. Sco giuven um, curt suenter ses emprendissadi, aveva el gia fatg ina giada sulet il tgau per la statua da Nepomuk. Ussa pia, 30-40 onns pli tard, è Willi puspè vid crear in nov Nepomuk. Els dus paran dad avair ina curiosa relaziun – els na vegnan betg libers l'in da l'auter.
Sche tut va tenor plan, duai la statua vegnir a fin anc il 2022. E lura avess Domat puspè anavos ses sontg Nepomuk en la Via nova; e Benno Willi ha lura creà la copia da la copia da la copia.