Lavuratori per giuventetgna - Proporz, maiorz, tge sforz! - Novitads

Lavuratori per giuventetgna Proporz, maiorz, tge sforz!

Far gust sin politica e surtut sin sa participar a votaziuns ed elecziuns: Quai è la finamira d'in lavuratori che l'Uffizi dal servetsch social porscha en connex cun il program «politica d'uffants e da giuvenils en il chantun Grischun».

Autur: Giana Maria Cantieni

Ils workshops mainan Fanie Wirth e Niculin Detrekoey da la Federaziun svizra dals parlaments dals giuvens. La finamira: Las giuvnas e giuvens dal stgalim secundar duain emprender d'enconuscher il nov sistem d'eleger, chapir l'impurtanza da quel e savair tge gremis che vegnan elegids. La differenza cun il proporz dubel, il nov sistem d'eleger vegnan mussads cun exempels concrets.

Giuvnas e giuvens duain sa sentir capabels da sa participar politicamain ed inoltrar lur giavischs cura ch'els èn maiorens.

Autur: Fanie Wirth Federaziun svizra dals parlaments da giuventetgna

Gieu d'eleger

Cun partidas fictivas ed in chantun fictiv pon las scolaras ed ils scolars gist empruvar il sistem d'eleger. Els pon perfin votar sin lur telefonins per las candidatas ed ils candidats. Ils resultats vegnan projectads directamain en l'ala ed in diagram mussa la repartiziun da las vuschs. Uschia èsi pussaivel da cumparegliar ils differents sistems d'eleger e lur effects sin ils resultats finals. Il gieu fa pli palpabel l'entira teoria per las giuvnas ed ils giuvens che han per gronda part per l'emprima giada contact cun la tematica.