Siglir tar il cuntegn

Header

cuntegn

Lètg per tuts Adversaris han lantschà lur campagna

Represchentants e represchentantas da la PPS, la UDF e dal Center cumbattan cuminaivel cunter la «Lètg per tuts». Quella vegn ils 26 da settember a l'urna.

En il center stat per las adversarias ed adversaris il maletg da famiglia tradiziunal ch’els vulan mantegnair. La lètg duai er en il futur mo valair per la colliaziun tranter um e dunna, uschia hai num en la communicaziun. Quai n'haja da far nagut cun discriminaziun, perquai che quest «privilegi» sa basia sin fatgs biologics. Mo ina colliaziun tranter um e dunna possia stgaffir vita – quai stoppian ins proteger.

Ozendi na dastgan dus umens u duas dunnas betg maridar en Svizra. Els han sulettamain la pussaivladad per in partenadi registrà. Quai tanschia per proteger ils dretgs da pèrs omosexuals argumenteschan ils adversaris.

La «tema» per ils uffants

Ils adversaris da la lètg per tuts argumenteschan plinavant cun il bainstar dals uffants. «Lain nus propi ina societad senza babs?», uschia il Cusseglier naziunal Benjamin Roduit (Allianza dal Center). I dettia studis che mussian che l'absenza dal bab haja in'influenza sin la furmaziun da l'identitad.

Il president da l'Uniun democratica federala Daniel Frischknecht ha argumentà giuridic: il dretg per ina relaziun tranter uffant e bab existia en la convenziun per ils dretgs dals uffants da l'ONU. La lètg per tuts violeschia quest dretg.

RTR Novitads 12:00

Artitgels legids il pli savens