Siglir tar il cuntegn

Header

audio
Cussegl federal preschenta posiziun tar «Lex Netflix»
Or da Actualitad dals 08.03.2022.
laschar ir. Durada: 3 minutas 52 Secundas.
cuntegn

Lex Netflix Cussegl federal preschenta arguments

Era ils servetschs da streaming duain sustegnair il film svizzer cun 4% da lur svieuta svizra.

La midada da la lescha federala da film prevesa ch’era Netflix, Amazon Prime u era Disney+ ston davent dal 2024 sustegnair la branscha da film svizra cun almain 4% da lur svieuta annuala ch’els fan en Svizra. Sco quai ch’il minister da cultura, Cusseglier federal Alain Berset, ha ditg avant las medias a Berna possian ils servetschs far quai a moda directa, cun investir en producziuns da film svizras u cun pajar ina taxa da cumpensaziun a favur dal film svizzer. Las Svizras ed ils Svizzers pon decider ils 15 da matg a l’urna davart la revisiun che las partidas giuvnas da la PPS, da la PLD, ils giuvens verd-liberals sco era secziuns chantunalas da l’Allianza dal Center han prendì.

Mintg’onn 18 milliuns francs

Sper quai duain ils servetschs da streaming vegnir obligads da tegnair en lur portfolio almain 30% films europeics. Tenor las calculaziuns da l’Uffizi federal da cultura fetschian ils servetschs da streaming ina svieuta annuala da passa 300 milliuns francs en Svizra. Quai senza pajar taglia. Ensemen cun las contribuziuns dals emetturs da televisiun da l’exteriur che fan reclama en Svizra, sco era ils servetschs da video on demand ch’èn da nov era suttamess a la taxa, quinta l’Uffizi federal da cultura cun in sustegn supplementar per il film svizzer da 18 milliuns francs per onn.

RTR actualitad 17:00;

Artitgels legids il pli savens

Scrollar a sanestra Scrollar a dretga