Siglir tar il cuntegn

Header

cuntegn

Lufs en GR Set trieps ed almain 55 lufs

Almain 55 lufs – cun tants quinta l'Uffizi da chatscha e pestga actualmain en il Grischun. Quels sa repartan sin set trieps, pèrins e lufs singuls.

Quants lufs exact ch'i dat actualmain en il Grischun na po Arno Puorger, il responsabel per ils animals gronds da rapina da l'Uffizi da chatscha e pestga, betg dir. El quinta dentant cun almain 55 lufs. Trieps, pèrins e singuls.

Il chantun quinta actulamain cun set trieps:

  • San Bernardino
  • Beverin
  • Muchetta
  • Val Gronda
  • Piz Bargias
  • Stagias
  • Morobbia (sa mova sin il cunfin cun il Tessin)
audio
Sfida luf: Quants vivan insumma en il Grischun?
ord Actualitad dals 22.12.2021.
laschar ir. Durada: 2 minutas 44 Secundas.

Sper quai datti divers lufs singuls ed il chantun quinta che quatter pèrins sa chattan en il Grischun. Tranter auter er en la regiun dal Calanda. Là na quinta il chantun il mument betg pli cun in triep. Per esser in triep dovri numnadamain almain trais lufs, ed in da quels sto esser ina femella.

Chagniels n'hai quai onn betg dà uschè blers sco l'onn passà, il chantun ha dumbrà 14 tar ils trieps dal Beverin, Stagias e tar il nov triep dal San Bernardino. I saja dentant pussaivel ch'i saja daplirs e ch'ins n'haja anc betg vis ulteriurs.

Grev da tegnair la survista

Insumma saja grev da tegnair la survista da tut ils lufs en il Grischun. Il problem è tenor Arno Puorger ch'ils lufs guardan or fitg sumegliant, uschia ch'ins è visà vi sin provas geneticas. Vitiers vegn che las capacitads tar il labor a Losanna èn limitadas. Quai er pervi dal dumber da lufs che crescha en l'entira Svizra.

Schliaziun è la revisiun da la lescha da chatscha federala

Divers lufs fan er problems. Cunzunt il triep dal Beverin ha adina puspè attatgà animals da niz, per part era gronds. Perquai ha il chantun fatg la dumonda da regular quest triep e da sajettar il bab dal triep. Questa dumonda è dentant vegnida refusada dal BAFU, l'Uffizi federal da l'ambient. Il chantun ha fatg recurs tar il Tribunal federal administrativ.

audio
Sfida luf: Tge è la schliaziun per il Grischun?
ord Actualitad dals 22.12.2021.
laschar ir. Durada: 2 minutas 50 Secundas.

Per pudair simplifitgar als chantuns da regular ils lufs, dovra quai tenor il cusseglier guvernativ responsabel Mario Cavigelli exnum ina revisiun da la lescha da chatscha federala. E quai stoppia capitar tar il parlament federal a Berna. Ils chantuns da muntogna sajan dafertant sa mess ensemen per avair dapli forza, ed han lura er la pussaivladad da plazzar lur arguments en las cumissiuns responsablas, uschia Mario Cavigelli.




Ord l'archiv:

Al Calanda avevi dà il 2012 ils emprims lufs pitschens en Svizra. Cun quai eran ils lufs al Calanda daventads l'emprim triep en Svizra. Uss na vala quel betg pli sco triep, perquai ch'el n'ademplescha betg pli ils criteris.

video
L'emprim triep da luf svizzer
Or da Telesguard dals 06.09.2012.
laschar ir. Durada: 1 minuta 22 Secundas.

RTR actualitad 11:00

Artitgels legids il pli savens

Scrollar a sanestra Scrollar a dretga