Tenor il cusseglier guvernativ Marcus Caduff hajan ins stuì quintar cun questa decisiun, cun quai ch'ins haja damain chapientscha saja la regla da 2G+. Tenor la regla da 2G+ ston ins esser vaccinà u guarì da corona e sper quai anc preschentar in test da corona negativ sch’ins vul ir en clubs e bars.
Per vaccinads grev da chapir
Per Marcus Caduff saja grev da declerar quai a las persunas che sajan vaccinadas e hajan cun quai fatg lur duair. Uschia il cusseglier guvernativ envers il schurnal regiunal dad SRF. Per la gastronomia da notg, centers da fitness e bogns cuverts saja quai sco serrar il manaschi. Quai muntia per questas fatschentas pli u main ch'els stoppian serrar. La svieuta vegni uschia a sa reducir marcantamain ed i rendia strusch da laschar avert la portas per be paucas singulas persunas. In positiv saja dentant ch'ils test sajan gratuits.
