Siglir tar il cuntegn

Header

cuntegn

Memia bleras pendenzas Dretgira regiunala Plessur survegn dapli derschadras

La dretgira regiunala Plessur survegn dapli persunal, quai almain temporarmain per dus onns. La raschun è che la pluna da cas pendents a la fin da l’onn vegn mintg’onn pli gronda.

Uschia saja la finamira da reducir ils cas pendents cun derschadras e derschaders extraordinaris. Quai scriva la Cumissiun per giustia e segirezza dal Cussegl grond, l'instanza ch’ha dà il consentiment per l’augment da persunal. I sa tracta d’in augment temporar da duas plazzas cumplainas. Quellas partan trais derschadras ed in derschader, mintgamai cun in pensum da 50%.

La dretgira regiunala Plessur è la pli gronda dal chantun. En media haja dà mintg'onn 1'775 novs cas per la dretgira regiunala e 118 cas per la dretgira da mesiras repressivas, ch'è part da la dretgira regiunala Plessur. Radund 60 cas sajan ils davos tschintg onns mintgamai restads pendents a la fin da l'onn, scriva la cumissiun vinavant.

Il favrer 2021 aveva il Cussegl grond revedì parzialmain la lescha da l'organisaziun giudiziala e stgaffì la pussaivladad da sustegnair dretgiras chantunalas cun persunal supplementar sche las dretgiras han memia bler da far u sche derschaders u derschadras na pon betg lavurar durant ina pli lunga perioda da temp.

audio
Per tadlar curt e cumpact
00:56 min, RTR Audio dals 11.10.2021.
laschar ir. Durada: 00:56 minutas.

RTR novitads 09:00

Artitgels legids il pli savens

Scrollar a sanestra Scrollar a dretga