Che la racolta da mel d’avieuls varieschia d’in onn a l’auter saja normal, di Martin Schwegler da l’Associaziun d’apicultura da la Svizra. Extraordinari saja dentant ch'ils avieuls hajan fatg uschè pauc mel, ch'apiculturs hajan stuì pavlar lur pievels per che quels na morian betg da la fom. Quai en consequenza da l'aura trida durant la primavaira e la stad.
Auter che tar ils apiculturs e las apiculturas en la Bassa, n’han ils avieuls en il Grischun betg patì uschè fitg da l’aura. Damai che l’entir svilup da la natira succeda in zic pli tard, ha ina part dals pievels d’avieuls pudì sa sviluppar bain. Uschia spetga Andrea Müller da l'Uniun grischuna d'apiculturs ina racolta da mel mediocra.
Tenor Martin Schwegler dependa la racolta dentant adina ad blers facturs locals. Perquai dettia grondas differenzas regiunalas. En general saja la davosa racolta da mel d’avieuls dentant stada plitost povereta en Svizra.
Era a Segnas hai dà pauc mel d'avieuls
Barla Jacomet n'ha betg pudì racoltar bler mel d'avieuls quest onn. L'apicultura da Segnas ha era sentì la schlett'aura dals davos mais. Las temperaturas sajan ditg stadas memia fraidas per ch'ils avieuls avessan pudì vegnir activs. Ultra da quai hai fitg savens fatg schlett'aura durant las fasas decisivas per la racolta da mel. Per exempel hai mo dà paucs dis suleglivs durant il temp da fluriziun da las flur-portg e da las crestas-cot. Quai haja gì ina ferma influenza sin la quantitad da mel ch'ils avieuls hajan pudì producir.
