-
Bild 1 von 3. Il café Fümm è tradiziun a Zernez. Dapi generaziuns van las dunnas da Zernez a baiver il cafè en quest local. Bildquelle: RTR, F.Caduff.
-
Bild 2 von 3. Dapi 3 onns maina Andreia Gonçalves il café. Bildquelle: RTR, F.Caduff.
-
Bild 3 von 3. La manadra Andreia Gonçalves tutga tar ils 18% da la populaziun da Zernez ch'è oriunda dal Portugal. Bildquelle: RTR, F.Caduff.
En mauns Portugais
Il Café Fümm ha tradiziun a Zernez. Mintga di s’inscuntran pil pli las dunnas da Zernez vi da la maisa radunda per baiver il café e dar ina baterlada sur da tuttas sorts. E quai dapi generaziuns.
Avant 3 onns, il 2012, ha surpiglià la Portugaisa Andreia Gonçalves quest lieu tuttafatg «Zernezer». Quai ha procurà per diversas reacziuns dals burgais da Zernez. Per in u l'auter era quai nagin problem ed auters avevan forsa in zic tema che lur Café pudess daventar ina chasa portugaisa. Però quai n' era betg l’intenziun dad Andreia Gonçalves. Ella vul avair in café per tuttas e tuts – per Svizzers e Portugais e per tut ils auters. Tuts en bainvegnids.
In lieu d’inscunter
Sch’ins va en il Café Fümm, lura s’inscuntran uss dunnas svizras e dunnas portugaisas. Ins na vesa savens tut las dunnas ensemen vid ina maisa. Però ins pudess dir che cun exempels sco il Café Fümm sa fa in pass vinavant per manar ensemen la cultura svizra e portugaisa.
Nua ch' il pass da l’integraziun è gia pli grond è tar las mammas cun uffants che van ensemen a scola. Là datti pli savens discurs tranter Svizras e Portugaisas. Era ves’ins adina pli savens ils uffants da tuttas dus culturas a giugar ensemen
E tgi sa, forsa ch’ins vesa en in per onns ils Portugais ed ils Svizzers ensemen a baiver café vi da la maisa radunda.