Murezi Candinas na vesa sasez betg exnum sco original: «Mo mia bucca largia è forsa schon in pau speziala», manegia il pur da 74 onns.
Ed el tschantscha propi sco il bec è creschì. Sgnoccas, commentaris u ina tucca s’audan simplamain tar Murezi Candinas. Spezialmain era cun la giuventetgna. Ed als dus biadis raquinta el gugent magari ina u l'autra sgnocca. Il temps cun ils biadis giauda el zunt fitg.
Betg adina stà in dals gronds pleds
El na haja dentant betg adina discurrì uschè bler sco ussa. Da giuven na tschantschavia el betg tant. «Quai eran dentant era anc auters temps. Pli baud aveva in giuven buob da star eri e betg da far baterladas», constatescha Murezi Candinas. «Saja quai en scola u era durant ina radunanza.»
Betg mo la bucca tutga tar Murezi Candinas
Murezi Candinas na vesian ins betg savens senza chapitscha. Cun 27 onns ha el maridà e quai di ha el survegnì regalà ina chapitscha. Dapi lura s’auda la chapitscha simplamain tar Murezi Candinas.