Tipic Zernez
Davent da Costetta pon ins vesair giu la rauba tipica per Zernez, per exempel il Parc Naziunal Svizzer u il chastè Planta-Wildenberg. Ins vesa era las vias che mainan tras Zernez, ch’è in punct central per il traffic. Tras Zernez va la via che maina tras l’Engiadina. Ins po ir vers l’Engiadin’Ota ni lura vers l’Engiadina bassa. Ed ina via va vers il Pass dal Fuorn che maina en Val Müstair ni lura en l’Italia.
A Zernez datti però anc bler dapli da vesair. Quest’emna datti mintga di a las 11:45 istorgias or dil mintgadi da Zernez. Istorgias or da la vita en il vitg ed istorgias da persunas e lieus ch’èn tipics per Zernez.
In lieu cun tradiziun
Costetta è in lieu impurtant per las Zernezras ed ils Zernezers. Dasper la survista ch’ins ha dal vitg, sa chattan sin la costa maisas, banchins e in lieu per grillar. I è in lieu nua ch’ins inscuntra adina puspè la glieud dal vitg ed in lieu nua ch’ins ha era gia fatg ina u l’autra festa.
E che ch’ins na dastga betg emblidar da menziunar è ch’ins discurra da Costetta e «la chasina gelga» . Quai e Ina chasetta ch’era pli baud la chamona da tir. Ozendi serva la chasina intents da tuttas sorts. Tuts pon prender a fit la chasina gelga.
Pli baud schev’ins che quai saja la chasetta dil Niculaus. Entant san ins però ch’il Niculaus viva plinensi vers il Munt Baselgia.