Il chantun Grischun abolescha sco la Confederaziun las mesiras da Corona. I na dat uschia betg pli in obligatori d'isolaziun per persunas infectadas. Vinavant scrodan er l'obligatori da mascrinas en il traffic public ed en instituziuns da sanadad.
Sco il chantun scriva, sajan manaschis ed instituziuns vinavant autorisadas da prescriver in'obligaziun da purtar mascrinas. Plinavant èsi er vinavant pussaivel da purtar facultativamain ina mascrina.
Per proteger persunas vulnerablas vegn cusseglià da dar aria curt ed intensiv, tegnair distanza e lavar regularmain ils mauns. Er vegn supplitgà da star a chasa sch'ins ha sintoms, quai suenter consultaziun cun il patrun.
Ospitals grischuns vinavant cun mascrinas
Ils ospitals grischuns han decis da mantegnair vinavant l'obligatori da mascrinas. Sco las gasettas da Somedia rapportan, valia l'obligatori dapertut là, nua ch'i haja pazients u pazientas. Ils ospitals sa basan sin las recumandaziuns da l'uniun Swissnoso.