Sin l'autostrada A13 tar il pausadi a Mesocco ha la polizia chantunala pudì franar ed arrestar ier suentermezdi in lader d'in auto. Quai è capità suenter ch’i ha dà ina annunzia, ch’in auto da persunas saja vegnì engulà a Bogn Ragaz. Curt suenter èn il vehichel e ses lader vegnids vesids en il tunnel dal San Bernardino.
Tar il pausadi saja l'um da 44 onns lura vegnì franà. Il test d'alcohol haja mussà che l'automobilist n'era betg capabel da charrar. Plinavant era el da viadi senza permiss. La polizia sclerescha uss sche l'arrestà è anc responsabel per ulteriurs delicts.