Sin basa d'in project da la Scol'aulta spezialisada dal Grischun aveva il Secretariat da stadi per l'economia (Seco) lantschà avant trais onns l'emprova da pilot. La finamira era da mitigar la dischoccupaziun stagiunala, e la mancanza da lavurers e lavureras qualifitgadas en la gastronomia. Quai per distgargiar l'assicuranza encunter la dischoccupaziun.
Suenter las evaluaziuns dal project da pilot fa il Seco facit: Ils custs sajan pli auts ch'il niz finanzial. E tar ils manaschis da la gastronomia, sco era tar il persunal saja l'interess stà pli pitschen che spetgà. Plirs elements da l'emprova da pilot duain dentant cuntinuar.