Sco la SBB scriva, meglierescha ella surtut la purschida per las sportistas e sportists d’enviern. Uschia datti mintga dumengia tranter Nadal e Pasca mintga mes’ura in tren da Cuira a Turitg e quai tranter las 14:00 il suentermezdi e las 20:00 la saira.
Plinavant datti da nov era ina colliaziun directa da Berna a Cuira via Burgdorf, Turitg e Ziegelbrücke. Las novas midadas van en vigur a partir dals 12 da december quest onn.
Meglras colliaziuns er en Svizra
Profitar pon pendularis er d'ina colliaziun nova da Genevra eroport a Turitg, Son Gagl che vegn prolungada mintg'ura fin a Rorschach. Plinavant datti er ina midada ad Altdorf en il chantun Uri, nua ch'ils trens dal IC2 tegnan mintga segunda ura. Uschia datti novas colliaziuns sveltas dad Altdorf en il Tessin ed a Turitg. A partir dal 2023 lura er a Basilea, sciva la SBB.
Colliaziun ad Amsterdam
Cun la midada dals uraris, vul la SBB porscher ina nova colliaziun en collavuraziun cun la ÖBB. Numnadamain pon ins uss ir en in tren da notg da Turitg, via Basilea e Cologna ad Amsterdam. Er en l'autra direcziun dettia ina colliaziun da la saira.
Il viadi a Minca egn per ina mes'ura pli curt. Quai dentant sut la cundiziun che las lubientschas arrivian ad ura. Uschia sa reduceschia il temp da trais dals sis EuroCity tranter Turitg e Minca dad oz quatter uras sin trais uras e mesa. A partir da la primavaira 2022 duain lura tuttas sis colliaziuns esser pli sveltas.
Nagins uraris stampads pli
La dumonda per ils uraris stampads, saja ida enavos a moda massiva ils ultims onns. Perquai ed er per resguardar las resursas natiralas, desista la SBB da publitgar uraris stampads.