Il guaud ha ina grond'impurtanza per il chantun grischun. Quai stima era la populaziun dal chantun. A questa conclusiun vegn il «Monitoring sociocultural dal guaud».
Differentas incumbensas, differenta valur
Ils dumandads e las dumandadas stiman las differentas funcziuns dal guaud. Tenor la retschertga vegn numnà il spazi da viver per la flora e la fauna sco prestaziun la pli impurtanta dal guaud – tant en il Grischun sco er en l'entira Svizra. Gist suenter vegn la funcziun da protecziun cunter privels da la natira e da las prestaziuns da clima. Dentant er la producziun da laina e la funcziun sco lieu da recreaziun vegnan stimads.
Il guaud è gia impurtant en l'uffanza
Var 90 pertschient da las persunas interrogadas en il Grischun inditgeschan ch'il guaud haja giugà ina rolla impurtanta en lur uffanza. Dus terzs da las Grischunas e dals Grischuns giuditgeschan ultra da quai ch'ellas ed els sajan infurmads bain u fitg bain davart il guaud. Omaduas valurs èn cleramain sur las valurs registradas per l'entira Svizra. Fitg bain infurmads sa sentan las Grischunas ed ils Grischuns davart ils temas «protecziun dal guaud cunter privels da la natira», «guaud sco territori da recreaziun» e «reglas da cumportament en il guaud». Il nivel d'infurmaziun è il pli bass tar ils temas «stadi dal guaud sin l'entir mund» sco er «occurrenzas en ils guauds locals».
Muntada per igl uffizi da guaud
Per l'Uffizi da guaud e privels da la natira èsi impurtant da savair tge che la populaziun pensa en connex cun il guaud. Dasper las leschas e statisticas gida l'opiniun publica sa sviluppar la tgira dal guaud, sco il manader da l'uffizi Urban Maissen ha ditg.
In exempel è che la populaziun n’ha betg gugent sch’igl è dischurden dasper las sendas da viagiar suenter tagls da laina. Cun quella savida han ils uffizis forestals la pussaivladad d'evitar talas situaziuns.
En cumparegliaziun cun las duas emprimas enquistas n’hai tenor il manader da l'uffizi da guaud e privels da la natira Urban Maissen betg dà grondas midadas. In nov aspect ch’era la populaziun haja remartga saja la midada dal clima che sa fetschia da vesair en ils guauds.
