Museum d'art dal Grischun - Exposiziun annuala da las artistas ed artists grischuns - Novitads

Museum d'art dal Grischun Exposiziun annuala da las artistas ed artists grischuns

Differents artists ed artistas grischunas exponan lur ovras en il Museum d'art dal Grischun. L'exposiziun annuala avra sonda ils 11 da december las portas.

Autur: Giana Maria Cantieni

Las ovras da 36 differentas artistas ed artists grischuns vegnan preschantadas en il Museum d'art dal Grischun a Cuira a chaschun da l'exposiziun annuala. L'exposiziun dat ina survista da la lavur artistica actuala prestada en il e dal Grischun. Il medem mument metta l'exposiziun il punct final al program d'exposiziun 2021 dal museum. Averta è l'exposiziun dals 12 da december 2021 fin ils 31 da schaner 2022 en il tract nov dal museum.

Autorisads da sa participar a l'exposiziun annuala èn artistas ed artists ch'èn burgais dal Grischun u ch'èn creschids si en il Grischun sco er tut quellas e quels che han domicil fix en il chantun. Quest onn eran 138 artists ed artistas grischunas s'annunziadas per sa participar a l'exposiziun. La giuria da tschintg persunas hà valità tuttas ovras inoltradas, e la finala tschernì ed admess las ovras da 36 artistas ed artists a l'exposiziun.

Ina part speziala da l'exposiziun furman ils objects da performance da Pascal Lampert, il victur dal premi d'art da l'Uniun grischuna d'art 2021.