Dapi il 1872 datti il Museum da la natira dal Grischun – da lezzas uras anc sut in auter num ed en in auter lieu. Dapi lura ha il museum rimnà, conservà e documentà passa 370'000 objects. Quels èn per part en il deposit dal museum ubain mai stads exponids. Per il giubileum da 150 onns ha il museum fatg giu la pulvra ad inqual stgazi e fatg in'exposiziun speziala che mussa en tut 150 objects.
La nursa da Tujetsch e l'urs polar
Ils objects èn fitg differents davent d'animals da rapina, sur crappa, fossils, insects e plantinas èsi da chattar in zic da tut. I saja er stà tut auter che simpel da selectar ils 150 exponats per l'exposiziun da giubileum; ina selecziun tranter en tut passa 370'000 objects dal museum. Dumagnà en l'exposiziun han tranter auter
- l'urs polar sajettà d'in Engiadinais al Pol dal Nord,
- la pli gronda litgiva dal chantun
- u er la nursa da Tujetsch ch'i na dat ozendi betg pli.
Sper mussar objects ch'èn daditg betg pli, ubain mai stads exponids vul il museum a chaschun da ses giubileum era mussar sitgs ord la lavur scientifica – u era lavurs da museum sco per exempel, co animals vegnan preparads. Er la moda e maniera, co objects vegnivan mussads pli baud, e tge principis d'intermediar che valan oz, tematisescha l'exposiziun.
L'exposiziun speziala a chaschun dals 150 onns dal Museum dal natira dal Grischun cuzza anc enfin il schaner 2023.