Sper ina bun’idea musicala dovri era blera lavur en il studio da registraziun enfin ch’ina chanzun è pronta per ils radios u las plattafurmas da musica. Marcus Petendi, oriund d’Ardez, enconuscha omaduas varts.
Sco musicist enconusch’ins el sut il num d’artist «Calandaboi» u or da bands sco «Polyphone» ed «Indefinied Illness». Dapi il mars offrescha el era registraziuns da musica en ses pitschen «Flat Peak Studio» a Cuira.
I porta a mai dapli sch’il resultat è bun che sch’il musicist è ruinà finanzialmain.
Il studio haja Marcus Petendi atgnamain drizzà en per pudair registrar sez sia musica empè da dar ora raps per registraziuns en studios. Suenter pliras collavuraziuns cun autras musicistas e musicists as haja però sviluppà ina dumonda per sia lavur da producent. Plinavant veglia el era sustegnair artistas ed artists giuvens che n’han anc betg in grond budget finanzial.
Impurtant è l’emoziun
Sch’i va per registrar ina chanzun saja impurtant d’exprimer las emoziuns. Quellas na possian ins betg curreger u agiunscher cun il computer. Correcturas da melodia, ritmica u armonias sajan percunter pussiblas senza problem e quellas vegnian era savens fatgas.
Las emoziuns èn grevas da curreger ma era da transportar sco musicist
I saja ina rauba da tenuta quant ch'ins curregia en la producziun, impurtant saja dentant che tuts èn perencletgs e che l’artista u l’artist vegn preschentà en la meglra glisch.
L’exempel concret
Quant che Marcus Petendi po zambregiar sch’ins na chanta betg uschè bain vulev jau chattar ora tar mia visita en il «Flat Peak Studio». Cun in «beat», pia ina instrumentala, ch’il producent aveva gia producì, avain nus registrà in per lingias improvisadas. Co ch’il resultat tuna udis en la reportascha sut: