La plattafurma istorica per mintgin e mintgina è vegnida fundada l'onn 2017. Uniuns, instituziuns ma era persunas privatas pon publitgar sin nossaistorgia.ch documents, videos ed audios istorics. Dacurt ha la pagina surpassà il cunfin da 10'000 documents. En tut èn gia 575 interessents ed interessentas per l'istorgia commembers. Nossaistorgia.ch cuntegna documents istorics, surtut fotografias or da tuttas regiuns dal chantun Grischun. Las spartas dal turissem, da l'agricultura e da famiglias sajan represchentadas fermamain, di Flavio Huonder.
Las regiuns dominantas sin la pagina èn la Surselva e l’Engiadina Bassa.
Da chattar datti da tuttas sorts, las pli veglias fotografias èn da l'emprim temp ch’i deva apparats da fotografar. Romano Plaz da Savognin è in utilisader activ da quest archiv. El ha gia partì passa 500 documents, il pli èn quai fotografias ch'el, ses perdavants u autras famiglias han tegnì en salv. El retschertga l'istorgia davos las fotografias e las fatschas e parta quai sin la pagina nossaistorgia.ch.
Jau lavur 24 uras, spiertal u mental, simplamain adina vid ina istorgia.
Valitaziun da la pagina
Reto Weiss, archivar da l'archiv dal stadi dal chantun Grischun, vesa la pagina nossaistorgia.ch sco plattafurma nua ch'ins baratta fotografias, in'alternativa a Facebook u Instagram. Per in archiv manchian tar intgins documents datas pli exactas.
Tar las datas èsi impurtant da sa tegnair a las tschintg dumondas tgi, tge, cura, nua, pertge?
Ils documents èn interessants ed uschia vegnan las isanzas e regurdanzas dadas vinavant a las proximas generaziuns.
Jau inditgass la pagina sco forum tematic per glieud che s'interessa per l'istorgia grischuna.
Il futur da l'archiv
Ina pagina communabla da la pagina franzosa (notreHistoire.ch), la pagina taliana (lanostraStoria.ch) e la pagina bilingua rumantsch/tudestg (nossaistorgia.ch) sut il titel «historiaHelvetica.ch» saja tenor il curatur da la pagina en planisaziun.