Millis da registraziuns da video ed audio ha Radiotelevisiun Svizra Rumantscha en ses tschalers. I sa tracta d’in dals archivs ils pli impurtants da quest gener en la Svizra rumantscha. E per avrir quest stgazi han la direcziun generala ed il cussegl d’administraziun da la SRG SSR decidì da constituir la Fundaziun Patrimoni Cultural RTR.
Profitar da la nova fundaziun duain era projects che RTR fa en collavuraziun cun autras organisaziuns e partenaris – per digitalisar, elavurar e preschentar il patrimoni cultural rumantsch.
Jau sun cuntent che la SRG SSR po far qua in'ulteriura contribuziun che va surtut a favur da la Svizra rumantscha e che rinforza sia identitad.
La nova fundaziun cumenza sia lavur il 1. da schaner 2022. Al cussegl da fundaziun fan part il directur da RTR Nicolas Pernet, Beatrice Baselgia-Brunner, Elena Luzio e Theo Mäusli.