La regenza ha deliberà la missiva tar la revisiun parziala da la lescha davart ils dretgs politics. Votar per brev duai en l'avegnir daventar gratuit. Da nov surpigliass il chantun il porto per las brevs da votaziun. Finamira è dad uschia auzar la participaziun a votaziuns. Las vischnancas duain mintgamai francar las brevs per la posta A, uschia ch'ins pudess en l'avegnir simplamain dar giu la brev da votaziun fin il venderdi avant la votaziun u elecziun, e quai en tut las vischnancas dal Grischun.
Quai è la quarta varianta da votar gratuit sper la votaziun a l'urna, la votaziun anticipada tar in post designà da la vischnanca e la votaziun per correspundenza cun metter la charta en la chascha da brevs da la vischnanca. La francatura à integrada en in code datamatrix sut l'adressa. Sin basa da quest code pon vegnir eruids ils custs da porto effectivs.
