Novitads dals 13-07-2024 - Silvan Breitenmoser è nov CEO da la Clinica Gut a San Murezzan
Plinavant ha la vischnanca da Val S. Pieder ha fatg l'onn passà in gudogn da 2,1 milliuns francs ed ils Calanda Broncos èn per la 13avla giada campiuns svizzers. Quai èn intgins dals temas da la sonda.
La Clinica Gut – cun sedia a San Murezzan – survegn in nov CEO. Silvan Breitenmoser è vegnì elegì sco successur d'Urs Baumberger, che maina la gruppa ad interim dapi il matg. Quai communitgescha la clinica. Ils ultims onns ha el lavurà sco schef da finanzas e CEO da la CHC Holding, tar la quala er il center dal cor e neurologia a Münsterlingen tutga. Breitenmoser cumenza ses nov post l'entschatta da l'auter onn.
Legenda:
Flickr
La vischnanca da Val S. Pieder ha fatg l'onn passà in gudogn da 2,1 milliuns francs tar expensas da passa 10 milliuns francs. La radunanza communala ha approvà il quint annual. Ultra da quai han las votantas ed ils votants dà glisch verda ad ina dumonda d'emprest da la societad d'alp Selva da 150'000 francs, sco er ad in credit da 160'000 francs per metter en urden lingias da drenascha sin il territori da la vischnanca.
Ils Calanda Broncos han defendì il titel da campiun svizzer en l'American football cun success. Per la 13avla giada han ils Grischuns gudagnà il Swiss Bowl, quai encunter ils Rengades da Turitg cun 35:14. Per la victoria han ils Broncos però stuì cumbatter. Ils Turitgais èn ids baud en avantatg. Suenter l'emprim quart stevì 0:7, suenter la mesadad dal gieu lura 7:7.
Il di en survista
Themen in diesem Newsticker
Calanda Broncos èn per la 13avla giada campiuns svizzers
Colonnas avant il Gottard èn sa schliadas
Barbora Krejcikova gudogna a Wimbeldon
Rachetas da SpaceX na dastgan betg partir
Soazza: Incendi tar transport d’autos
Accident mortal a Curaglia
Directur per la prevenziun d'accidents vul dapli sustegn politic
Silvan Breitenmoser è nov CEO da la Clinica Gut a San Murezzan
President american Biden cuntinuescha cun ses cumbat electoral
Val San Pieder ha fatg gudogn da 2,1 milliuns francs
