Mesemna saira curt suenter las 20:00 hai dà in’acziun gronda da polizia en il center da Cuira. Suenter che la polizia ha survegnì l’annunzia d’ina odur betg identifitgabla en ina chasa en la Steinbruchstrasse a l’ur da la citad veglia – èn la polizia da la citad, la polizia chantunala, ils pumpiers da Cuira sco er ils pumpiers da la Ems Chemia ed il Care Team grischun vegnids sin il plaz.
Per tractaments eventuals èn medemamain stads a disposiziun dus teams d'ambulanza ed in medi d'urgenza.
La chasa pertutgada è temporarmain vegnida evacuada. Suenter las 22:00, cura ch'igl è stà cler che la substanza cun in'odur curiosa na saja betg privlusa – han ils abitants puspè pudì turnar a chasa.
Attatga sin abitanta
Tenor emprimas enconuschientschas è ina dunna giuvna vegnida attatgada. In um haja duvrà ina substanza sumeglianta a spray da paiver, haja engulà il telefonin e la bursa da la dunna ed haja bandunà la chasa, scriva la Polizia chantunala. L'um haja pudì vegnir arrestà en il decurs da la saira. La dunna è vegnida blessada levamain e transportada en l'ospital chantunal.
-
Bild 1 von 4. Acziun da polizia en la Steinbruchstrasse a Cuira. Las forzas da segirezza han serrà la via. Bildquelle: RTR.
-
Bild 2 von 4. La polizia, ils pumpiers da la citad e da la Ems Chemia ed in medi d'urgenza èn stads en acziun. Bildquelle: RTR.
-
Bild 3 von 4. Ils abitants e las abitantas han stuì bandunar la chasa. Bildquelle: RTR.
-
Bild 4 von 4. Pliras persunas avevan resentì ina odur curiusa. Bildquelle: RTR.