Siglir tar il cuntegn

Header

audio
Organisaziuns caritativas registreschan main dumondas d'agid
Or da Actualitad dals 20.10.2021.
abspielen. Laufzeit 3 minutas 41 Sekunden.
cuntegn

Organisaziuns caritativas Damain dumondas d'agid durant la pandemia

L'onn da gestiun 2020/2021 ha il Succurs d'enviern gì pli paucas dumondas per agid. En tut ha l'organisaziun purschì maun en 155 cas, sco il cussegl da fundaziun ha comminitgà. Gia l'onn passà eran ils cas d'agid sin in livel sumegliant. Avant la pandemia aveva il Succurs d'enviern anc sustegnì bunamain 100 cass dapli per onn. Quai munta che l'agid è stà dumandà pli pauc durant il temp da corona.

Ils contacts sajan stads da moda electronica u per telefon, ha ditg la presidenta dal Succurs d'enviern Tina Gartmann-Albin. Quai na saja betg adina simpel, sch'ins na vesia betg il visavi.

audio
Tina Gartmann-Albin: I n'è betg simpel da far tut senza contact persunal
aus RTR Audio vom 19.10.2021.
abspielen. Laufzeit 22 Sekunden.

L'organisaziun Succurs d'enviern sustegna persunas en il Grischun che vivan al minimum d'existenza. Il servetsch surpiglia per exempel il quint da cassa da malsauns, paja in turnister da scola ad uffants u gida cun vestgadira u mobiglias.

Il Succurs d'enviern / Winterhilfe

Avrir la box Serrar la box

La fundaziun ha ses num dals onns trenta. Lura gievi surtut per gidar persunas che n'avevan betg avunda resti chaud l'enviern. Ozendi porscha il Succurs d'enviern dentant agid finanzial ubain er material (vestgadira) l'entir onn.

La fundaziun è da chasa en l'Uffizi social dal chantun che metta a disposiziun persunal e localitads. Finanzià vegn tut cun donaziuns.

Era Caritas e Crusch Cotschna n'han betg dapli dumondas

Quest trend conferman era Caritas e Crusch Cotschna. Era quellas ovras d'agid n'han betg gì dapli dumondas durant la pandemia. Quai svilup n'hajan ellas betg spetgà. Pervia da la pandemia avevan quellas duas organisaziuns survegnì sustegn finanzial extraordinari da la Chadaina da Fortuna per l'agid direct. Vul dir: Quellas organisaziuns pudevan durant corona gidar spert cun meds finanzials. Quai pudess declerar, daco ch'il Succurs d'enviern aveva damain dumondas d'agid durant il temp da pandemia.

Nus ans eran preparads sin bler dapli dumondas che normalmain.
Autur: Placi Degonda Crusch Cotschna GR

In auter factur pudess tenor Placi Degonda da la Crusch Cotschna esser, ch'il stadi haja surpiglià fitg svelt da pajar ils 20% da la paja che mancan, perquai che cun lavur curta tar persunas cun pajas bassas vegn pajà mo 80% da la paja.

Dapli persunas vivan al minimum d'existenza

Il dumber da persunas che viva al minimum d'existenza en Svizra n‘è betg sa sbassà. L'onn 2020 vivevan 735'000 persunas en Svizra al minimum d'existenza (8,5% da la populaziun). Cumpareglià cun l'onn avant è quai ina creschientscha da 10%.

RTR novitads 06:00

Artitgels legids il pli savens

Scrollar a sanestra Scrollar a dretga