L'onn da gestiun 2020/2021 ha il Succurs d'enviern gì pli paucas dumondas per agid. En tut ha l'organisaziun purschì maun en 155 cas, sco il cussegl da fundaziun ha comminitgà. Gia l'onn passà eran ils cas d'agid sin in livel sumegliant. Avant la pandemia aveva il Succurs d'enviern anc sustegnì bunamain 100 cass dapli per onn. Quai munta che l'agid è stà dumandà pli pauc durant il temp da corona.
Ils contacts sajan stads da moda electronica u per telefon, ha ditg la presidenta dal Succurs d'enviern Tina Gartmann-Albin. Quai na saja betg adina simpel, sch'ins na vesia betg il visavi.
L'organisaziun Succurs d'enviern sustegna persunas en il Grischun che vivan al minimum d'existenza. Il servetsch surpiglia per exempel il quint da cassa da malsauns, paja in turnister da scola ad uffants u gida cun vestgadira u mobiglias.
Era Caritas e Crusch Cotschna n'han betg dapli dumondas
Quest trend conferman era Caritas e Crusch Cotschna. Era quellas ovras d'agid n'han betg gì dapli dumondas durant la pandemia. Quai svilup n'hajan ellas betg spetgà. Pervia da la pandemia avevan quellas duas organisaziuns survegnì sustegn finanzial extraordinari da la Chadaina da Fortuna per l'agid direct. Vul dir: Quellas organisaziuns pudevan durant corona gidar spert cun meds finanzials. Quai pudess declerar, daco ch'il Succurs d'enviern aveva damain dumondas d'agid durant il temp da pandemia.
Nus ans eran preparads sin bler dapli dumondas che normalmain.
In auter factur pudess tenor Placi Degonda da la Crusch Cotschna esser, ch'il stadi haja surpiglià fitg svelt da pajar ils 20% da la paja che mancan, perquai che cun lavur curta tar persunas cun pajas bassas vegn pajà mo 80% da la paja.
Dapli persunas vivan al minimum d'existenza
Il dumber da persunas che viva al minimum d'existenza en Svizra n‘è betg sa sbassà. L'onn 2020 vivevan 735'000 persunas en Svizra al minimum d'existenza (8,5% da la populaziun). Cumpareglià cun l'onn avant è quai ina creschientscha da 10%.