Dapi che Arnold Bachmann ha surpiglià il 1. da schaner 2000 il timun da l'ospital chantunal dal Grischun hai dà bleras midadas. In exempel ha num SUN. Cun quai project han el e ses team realisà la construcziun dals novs bajetgs centrals per circa 430 milliuns francs. L'idea era d'adattar l'infrastrcutra pli ferm al tractament ambulant e main al tractament staziunar. Plinavant ha el era pudì introducir sco emprim ospital en Svizra il nov sistem da finanziaziun. Persunalmain è dentant la fusiun dals trais ospitals da Cuira stà il grond success. I saja stà ina gronda sfida d'eliminar pregiudizis ed armonisar differentas culturas.
Pensiun gea, lungurella na
Era sche Arnold Bachmann sa legra sin la pensiun, sortir cumplettamein da la vita professiunala na vul el betg. Uschia resta el president dal cussegl d'adminstraziun da l'ospital chantunal da Glaruna e da la clinica da reabilitaziun ad Andeer, vicepresident da l'ospital da Tavau e president da l'uniun Esanita, che lavura vi da dossiers medicinals digitals.
Plinavant surpiglia el il mandat da manader da project per elavurar in plan per l’avegnir da l’ospital a Walenstadt (SG). L’idea è che l’ospital Walenstadt pudess porscher in provediment da basa e l’ospital chantunal a Cuira surpiglia il provediment spezialisà era per la regiun enturn Walenstadt, ha ditg Bachmann vers RTR. Ensemen cun in team da project vegn elavurà ina proposta per mauns dal parlament dal chantun Son Gagl.