Siglir tar il cuntegn
Inhalt

Ospital tut persunal En l’Ollanda na datti nagina ierarchia en il sectur da sanadad

Per Floris Tichler è quai stà in grond midament, cura ch’el è vegnì sco anestesist a l’ospital regiunal a Samedan. En sia patria n’enconuscheva el betg quest sistem. Tuts eran sin il medem livel, di l’Ollandais.

Floris Tichler, anestesist da l’Ollanda.
Legenda: Floris Tichler, anestesist da l’Ollanda. RTR, Anna Caprez

Turnà d’in viadi en il Nepal cun sia dunna, ha Floris Tichler cumenzà sia plazza sco anestesist a Samedan. Atgnamain be per in onn, entant èn els 21 onns en l'Engiadina e l'’um da 59 onns sa senta entant fitg bain en la regiun. El ama las muntognas e numna la val e la vischnanca da Madulain ses dachasa.

La lingua gida ferm per s’integrar

Floris Tichler ha emprendì svelt a discurrer «schwizertütsch». Era sch’el na discurria betg perfect la lingua, saja el bun da s’exprimer bain en tudestg. Be cura ch’i giaja per discussiuns pli spinusas durant sia lavur a l’ospital regiunal a Samedan, giavischia el mintgatant che ses stgazi da pleds fiss pli vast.

Er in auter mund politic

Gì da sa disar ha il bab da duas figlias er vi dal sistem politic en Svizra. El haja duvrà in bel temp fin ch’el saja vegnì londerora co che tut funcziunia.

Per esser sincer na chapesch jau anc oz betg adina il sistem politic svizzer!
Autur: Floris TichlerAnestesist da l'Ollanda

Sia lavur a l’ospital regiunal a Samedan plascha bain a Floris Tichler ed el sa senta er integrà bain en il team che consista da bunamain la mesadad persunas betg svizras. Sper el lavuran anc 6 auters Ollandais a l’ospital en Engiadin’Ota. Els discurrian dentant be mintgatant ollandais, surtut cura ch’i giaja per umor. Quel chapeschian ins meglier, sch’ins discurria er la lingua.

RR actualitad