Il december passà èn represchentantas e represchentants dad ovras idraulicas, uniuns d'ambient e pestgaders s'entupads per discutar davart l'aua restanta. Igl ha dà ina cunvegna da resguardar la quota d'aua restanta.
Factur impurtant
Tar ils directurs d'energia Svizra saja dentant adina puspè vegnì discutà davart l'aua restanta, quai tenor Mario Cavigelli, il president da la conferenza dals directurs chantunals d'energia. I sa tractia d'ina tematica fitg impurtanta perquai ch'i pertutga il potenzial da la producziun d'energia ord forza idraulica. I saja nairas uras da tematisar tuttas varts pussaivlas per meglierar la situaziun speziala.
Pro Natura
L'organisaziun d'ambient saja fitg irritada ch'i vegnia ussa tuttina puspè discutà da la quota d'aua restanta, di Armando Lenz, mainagestiun da Pro Natura Grischun. Vid la maisa radunda il december saja vegni decidì che las obligaziuns da protecziun existentas vegnian ademplidas, quai valia spezialmain per la segirada da la quantitad d'aua restanta. Dus terzs da las spezias da peschs sajan svanids u en privel da svanir.
Nus ans dumandain tge ch’il cumpromiss da la maisa radunda vala. Strusch è la tinta sientada, duai gia puspè valair insatge auter.
L'uffizi federal d'energia n'ha betg vulì commentar las pretensiuns da Mario Cavigelli. La maisa radunda haja gia fatg il december 2021 ina decleranza communabla. Quai sin basa dal dretg actual – dapli na dettia betg da dir.