Siglir tar il cuntegn

Parc Adula Da daners, libertad e bleras dumondas - la debatta Parc Adula

La libertad - il scumonds - ils daners. Trais dals puncts ch’èn vegnids discutads en la debatta pro e contra Parc Adula la gievgia saira a Mustér.

Da la vart dals aderents han Rico Tuor (Mustér) e Dumeni Tomaschett (Trun) empruvà da persvader il public en sala. Cumbattì l’idea d’in parc naziunal han Leo Tuor (Val Sumvitg) e Mario Alig (Vrin).

Legenda: Guardar il video «Leo Tuor: Betg jau - però il chaun perda la libertad». Durada 0:45 minutas.
Dals 03.11.2016.

La libertad è smanatschada

In dals arguments da la vart dals adversaris dal Parc Adula è quel che libertads vegnian restrenschidas en il parc. Per l'autur Leo Tuor na pareva quai en la debatta betg tant impurtant. I na giaja betg per la libertad. La libertad dals umans saja gia restrenschida fitg. I giaja per l'autenticitad.

Da l'autra vart vegnia la libertad, per exempel d'in chaun, che na pudess en in parc naziunal Adula betg pli vegnir manà atras la zona da coc, restrenschida, uschia Leo Tuor.

Legenda: Guardar il video «Dumeni Tomaschett: Las libertads ch'ins sperdess èn marginalas». Durada 1:10 minutas.
Dals 03.11.2016.

I saja ridicul da decider davart in project tant grond sco in parc naziunal pervia da libertads tant marginalas sco per exempel il scumond da bandunar turtgs en la zona da coc sco la Greina, quai ha detg da la vart dals aderents il president da vischnanca da Trun Dumeni Tomaschett. Il parlament da vischnanca da Trun è s'exprimì avant dacurt en favur dal Parc Adula.

Parcs e pops u nagut dal tut?

Sch'in parc po franar la depopulaziun da las valladas en Sursevla è ina dumonda averta. L'argument dals adversaris da far pops enstagl da parcs frunta sin l'argument ch'ins stoppia avair plazzas per tegnair ils pops cura ch'els vegnan creschids. E quellas plazzas dettia quai - almain 18 plazzas ch'i dovra per il manaschi dal Parc Adula, uschia ils aderents.

Legenda: Guardar il video «La relaziun da plazzas e pops». Durada 1:14 minutas.
Or da Actualitad video dals 03.11.2016.

Da subvenziuns e corrupziun

L'argumentari economic è vegnì manà en la discussiun adina puspè. In aspect da quel èn las subvenziuns spetgadas entras in parc naziunal. Quellas dovria quai, manegian ils aderents. Subvenziuns corrumpeschian, han manegià ils adversaris.

Legenda: Guardar il video «Tgi che subvenziunescha cumonda?». Durada 2:18 minutas.
Or da Actualitad video dals 03.11.2016.

Tgi che ha in parc ha dapli - dumondas e statements dal public

Suenter la discussiun al podium viva hai dà la gievgia saira en la sala da la claustra da Mustér ina runda gronda ed almain tant viva da dumondas e votums.

Legenda: Guardar il video «Debatta Parc Adula - las dumondas». Durada 33:00 minutas.
Dals 03.11.2016.

Tranter auter è vegnì a plaid l'anteriur cusseglier naziunal e mistral da la Cadi Walter Decurtins. El è s'exprimì en favur dal parc. Cunter il Parc Adula ha fatg in votum il guardiaselvaschina Werner Degonda.

RR actualitad 07:00