Siglir tar il cuntegn
Inhalt

Parc Adula Parc Adula – las emoziuns restan fermas

Durant emnas han las discussiuns davart il project dal Parc Adula leventà bleras emoziuns, ed era las uras suenter il cler na eran ils blers dumandads persvadids da lur posiziun, saja quai a Rabius, a Trun u en il Mesauc.

Ina sala plain glieud
Legenda: La dumengia cunter saira è la sala a Rabius emplenida cun adversaris dal Parc Adula. RTR, Gion Gieri Flepp

Uss hajan els in bun sentiment, els hajan puspè ditg tge ch’els veglian. Uschia hai tunà la dumengia cunter saira a Rabius, cura ch’in auto cun adversaris dal parc è arrivà da Vrin. A Rabius èn numnadamain sa rimnads ils adversaris per ina festa. I tanschia da savair ch’els abiteschian en ina bella cuntrada, ha manegià in auter um. E blers dals preschents han discurrì da la libertad che saja spendrada.

Il Mesauc è fitg dividì

En il Mesauc è la glieud era stada surstada dal resultat davart il project Parc Adula, dentant per part èni trumpads. I saja in di fitg trist per la Mesolcina, per il Grischun e per la Svizra, ha manegià in um. Cuntrari hai tunà en in’ustaria, la democrazia haja gudagnà, e suenter diesch onns na fiss nagut sa midà sco empermess dals responsabels dal parc.

In di suenter a Trun

Trun è la suletta vischnanca da la Surselva che ha ditg gea al project d’in parc, quai cleramain cun 58%. Era in di suenter la decisiun cuntraria da las bleras autras vischnancas di la glieud sin via ch’ella saja trumpada. E differentas persunas han crititgà il sa cuntegnair en il cumbat da votaziun, las fermas polemicas. Ed era a Trun èn las emoziuns anc grondas, adina puspè guntgeschan persunas il microfon.

RR actualitad 07:00 / 11:00