Parc Ela e Parc Adula - Las parallelas

Las discussiuns enturn il Parc Adula procuran tar in u l'auter per in déja-vu. Avant sis onns hai numnadamain dà fitg sumegliantas discussiuns en la regiun dal Parc Ela.

Laschar ir video «Las parallelas dals dus parcs – Ela ed Adula»

Las parallelas dals dus parcs – Ela ed Adula

2:43 min, dals 1.11.2016

Il Parc Ela ed il Parc Adula n'èn betg tuttina. Il Parc Ela è in parc da natira – il Parc Adula in parc naziunal. Las restricziuns dal Parc Ela n'èn betg uschè strictas sco quellas en il Parc Adula. Vul dir: Il Parc Ela n'ha nagina zona da coc. Auter il Parc Adula.

In déja-vu

Quai che collia ils parcs èn las discussiuns. Avant sis onns ha il suveran dal Grischun central gì da decider sch'el vul ch'il Parc Ela daventa in parc da natira tenor la lescha da la natira e la protecziun da la patria. En las 20 vischnancas ha quai dà aderents ed adversaris. In dals arguments cunter il Parc Ela era la tema da restricziuns.

Da l'adversari a l'aderent

In dals adversaris era il directur da las pendicularas da quest temp, Vendelin Coray. El ha cumbattì cun tutta forza il parc.

Vendelin Coray Avrir maletg en lightbox.

Legenda da maletgs: Vendelin Coray RTR, Prisca Bundi

«  Ei han dau garanzias, aber quellas garanzias savein nus buc crer vidlunder. Quei ei ina fetg gronda schula. »

Vendelin Coray
Avant sis onns

Da lezzas uras era Vendelin Coray persvadì, ch'i saja da quintar cun restricziuns entras il parc e che projects vegnian bloccads.

Il parc è ina buna chaussa

Uss tuna quai dentant tut auter. Vendelin Coray è da l'avis che tut na saja betg uschè nausch sco pensà: Bler sa saja relativà. El va schizunt anc pli lunsch e di ch'il Parc Ela haja purtà bler a la regiun. In label saja ina ferma marca ed ils collavuraturs dal parc fetschian buna lavur. Vendelin Coray n'è betg pli directur da las pendicularas, uss è el directur da Sviz Turissem, el è dentant anc adina collià cun la regiun ed è en la suprastanza da l'uniun da commerzi dal Surses. E precis questa uniun ha da curt schizunt collavurà cun il Parc Ela. Ensemen han els organisà la Festa Segantini.

«  Bia ei serelativau. Cul parc hai buc dau grondas midadas. Buc in project ch'ei vegnius bloccaus entras il Parc Ela. »

Vendelin Coray
Directur Sviz Turissem

Sut il stritg è Vendelin Coray daventà in fan dal Parc Ela, er sch'el è da l'avis ch'ins pudess anc optimar enqual chaussa. Cunzunt ch'ins pudess anc metter il focus pli fitg sin natira e cultura, quai saja numnadamein il pli grond potenzial da la regiun.