Siglir tar il cuntegn

Header

cuntegn

Parlament da Cuira Tualettas per las prostituadas en il Rossboden

La citad da Cuira duai installar tualettas stgaudadas per las prostituadas al Rossboden. Il parlament da la citad ha acceptà la proposta da la regenza. Ils custs per la fasa da pilot da sis mais muntan a 32’500 francs.

Inoltrà l’incumbensa aveva la parlamentara Xenia Bischof da la PS. Ella aveva pretendì in local da protecziun per che las prostituadas al Rossboden possian ir en il sitg e hajan in lieu da pausa. La regenza è però s’exprimida per ina varianta mo cun tualettas. L’argumentaziun: il dumber da prostituadas saja sa reducì pervia da corona.

Be tualettas per las prostituadas en il Rossboden?

En in rapport ha la citad evaluà quatter variantas:

  • container
  • rulotta
  • container cun tualettas separadas
  • be tualettas

Tar las emprimas trais variantas pudess la citad en pli anc porscher cussegliaziun ed accumpagnament a las prostituadas. Gliez custass sper l’infrastructura da 36’000 francs anc var 110’000 francs per la fasa da pilot da 6 mais.

audio
Be tualettas per las prostituadas en il Rossboden?
03:46 min, Actualitad dals 05.10.2021.
laschar ir. Durada: 03:46 minutas.

Varianta minimala

La quarta varianta – be tualettas stgaudadas – è la pli favuraivla cun custs da radund 32’000 francs en la fasa da pilot. L’executiva da la citad favurisescha quella varianta e propona quella al parlament. L’argument principal: cun corona saja il dumber da prostituadas sa sminuì. I lavurian be pli fin duas prostituadas en il Rossboden.

Realitad è in'autra

Tenor l’Agid cunter aids grischun, l’organisaziun che s’occupa regularmain da las prostituadas, n’èn questas cifras dentant betg pli actualas. Il dumber saja gia s’augmentà sin trais fin tschintg dunnas.

Era la media e parlamentara da Cuira Xenia Bischof crai che la prostituziun sin via s’augmentia puspè: «Bleras dunnas cunzunt da pajais da l’ost da l’Europa sa chattan da preschent en ina greva situaziun finanziala e vegnan puspè chatschadas en la prostituziun per insumma avair ina entrada».

Legenda: Cun sia incumbensa parlamentara ha la media e parlamentara Xenia Bischof pretendì in local da protecziun per las prostituadas en il Rossboden a Cuira. RTR, Claudia Cadruvi

Xenia Bischof aveva inoltrà l’incumbensa parlamentara ch'ha pretendì in local da protecziun per che las prostituadas en il Rossboden possian ir a sust u hajan in lieu per far pausa. En in tal local avess la citad era pudì porscher cussegliaziuns a las prostituadas, uschia l’idea.

RTR actualitad 17:00

Artitgels legids il pli savens

Scrollar a sanestra Scrollar a dretga