Siglir tar il cuntegn

Header

cuntegn

Parolas dal favrer Verda di duas giadas Gea e duas giadas Na

La Verda dal Grischun ha decis sias parolas per las votaziuns federalas dals 13 da favrer.

La Verda sustegna il pachet da mesiras a favur da las medias e l'iniziativa dal pievel che vul proteger uffants e giuvenils da la reclama da tubac. A l’aboliziun da la taxa da bul ed a l’iniziativa, che vul scumandar experiments cun animals ed umans, di la partida verda Na.

Mesiras a favur da las medias centralas per il Grischun

Medias independentas, fermas e differentas sajan, sco la partida scriva en sia communicaziun ina premissa substanziala per ina democraziun che funcziuna. Ellas garanteschian ch'ins po s'infurmar davart temas divers, contribueschan a la furmaziun da l'opiniun e sclereschan situaziuns d'abus. Dentant cumbattan las medias per il surviver. Las entradas entras reclama sa reduceschan d'onn tar onn. Per pudair s'adattar a la nova situaziun, duain las medias survegnir quest pachet limità da mesiras.

La lescha duai garantir la diversitad da las medias en Svizra. Chasas da medias pitschnas, localas vegnian sustegnidas pli ferm che grondas. Uschia duai vegnir garantì ch'i vegn er vinavant infurmà davart temas locals. Per il Grischun cun pliras linguas saja quest pachet in punct central.

Fimar è in problem per sanadad ed ambient

Las bleras persunas che fiman, han cumenzà gia sco minorens. Per dar cunterpais a quest fatg, saja impurtant da betg anc surmanar questa gruppa da vegliadetgna da fimar entras reclamas. Plinavant na saja il fimar betg be in problem per la sanadad, cun radund 10'000 morts ad onn en Svizra. Be radund in terz da las restanzas da las cigarettas sa tschentan en il rument. Il rest vegn battì en la natira, nua ch'i tschufragnan l'aua e tissientan animals.

La cuntraproposta è tenor la Verda be in alibi. Reclamas en gasettas gratuitas, a festivals u en medias socialas fissan vinavant lubidas – pia dapertut nua giuvenils han access.

Regal da taglia a concerns

Encunter l'aboliziun da la taxa da bul è la Verda perquai che quai fiss, sco la partida scriva, in regal da taglia a concerns. Ils ultims 20 onns haja la Confederaziun incassà grazia a quella radund 250 milliuns francs ad onn. Plinavant sajan concerns gronds, en spezial quels da finanzas, gia avantagiads envers interpresas pitschnas e mesaunas. Questa taxa guliveschia in zic questa malgistadad.

Scumond total d'experiments cun animals faschess donn

Cun l'iniziativa per scumandar experiments cun animals ed umans, vegnissan per exempel er scumandads studis d'observaziun che sajan bunas per il bainstar dals animals. Uschia sajettia quella iniziativa memia lunsch. Plinavant vegniss franà il svilup tar medicaments betg be per carstgauns ma er per animals. Uschia patissan la finala er animals.

Er experiments cun persunas vegnissan scumandads. Tals sajan dentant gia regulads a moda rigurusa e detagliada per proteger la dignitad e la persunalitad sco er la sanadad da las persunas. La Verda è perquai s'engaschada en il parlament per ina cunterproposta.

audio
Per tadlar curt e cumpact
ord RTR Audio dals 05.01.2022.
laschar ir. Durada: 36 Secundas.

RTR novitads 11:00

Artitgels legids il pli savens

Scrollar a sanestra Scrollar a dretga