Era il 2022 na datti nagina Higa. Ins na possia betg garantir la planisaziun e la realisaziun da l'exposiziun da commerzi, industria e mastergn HIGA. Quai però betg mo pervi da malsegirtads tras la pandemia, mabain tranter auter era perquai ch'il manader da fatschenta e delegà dal cussegl administrativ da la Expo Cuira SA Marco Engel terminescha sin la fin da l'onn sias activitads. Uschia n'ha l'exposiziun da primavaira betg lieu.
Grev da chattar futurs organisaturs u organisaturas
Ins haja gia fatg ina massa discurs cun eventualas organisaziuns da successiun, scriva l'Expo Cuira SA en in communitgà. Enfin oz n'haja quai dentant betg anc dà ina cunvegna. Cunquai che quest sectur saja fitg pertutgà da la pandemia, n'haja apparentamain nagina organisaziun interess da priorisar ed organisar la Higa per la primavaira vegnenta.
Uschia ha la Stadhalle Chur AG sco possessura decis da en l'avegnir prender per mauns sezza la surdada e la locaziun da la halla da la citad. La tschertga d'ina organisaziun pronta da realisar Higas en l'avegnir cuntinueschia però. Quai da la Stadthalle Chur AG en collavuraziun cun l'Expo Cuira SA.
