Autras branschas hajan tratg ils collavuraturs flexibels da la sparta dal turissem. En l'Engiadina sajan blers dal Portugal turnads en lur pajais oriund, perquai ch'i giaja meglier cun l'economia en il Portugal che pli baud. Tant pli grev saja ussa da chattar persunal adattà per la stagiun d'enviern.
Uniun da branscha
Era tar l'uniun da branscha pendicularas dal Grischun è il problem enconuschent. Ins fetschia patratgs en general, quant attractiv che la lavur en in territori da skis saja e co ch'ins possia chattar avunda persunal en l'avegnir. Emprims patratgs han las pendicularas fatg durant lur radunanza generala a la fin da l'emna passada. Là as haja tranter auter discutà davart tge ch'i duvrass per fascinar e motivar la generaziun Z, ils giuvens a partir da l'annada 1997, per ina lavur en il sectur dal turissem.
