Siglir tar il cuntegn

Header

cuntegn

Per tge vai? Abolir taxas da bul

I va per taxas che interpresas ston pajar sch’ellas dovran agen chapital – dentant be per summas da passa 1 milliun francs. Per far pli attractiva l’economia en Svizra ha il parlament decis d’abolir questas taxas. Causa in referendum vegn la fatschenta ils 13 da favrer a l’urna.

Fatschentas che vulan sa sviluppar ston investir. En il cas normal munta quai ch’ina fatschenta dovra dapli agen chapital. Sche questa summa surpassa 1 milliun francs pretenda la Confederaziun ina taxa d’emissiun da 1%, l’uschenumnada taxa da bul. Pertutgadas èn tant fatschentas existentas ch’augmentan l’agen chapital, ma er fatschentas novas. Sper la Svizra ed il Principadi da Liechtenstein imponan en Europa mo anc la Grezia e la Spagna ina taglia sumeglianta.

Il Cussegl federal e la maioritad burgaisa dal parlament sco er las grondas associaziuns economicas vulan abolir la taxa da bul. Ord lur vista profitassan cunzunt interpresas giuvnas che creschan fitg.

Lantschà il referendum ha la Partida socialdemocratica, ils Verds ensemen cun ils sindicats. Tenor il comité da referendum profitassan ils fauss, numnadamain concerns internaziunals e na betg burgaisas e burgais.

Tge capita tar in Gea u tar in Na?

Avrir la box Serrar la box

Sche la maioritad da las votantas e dals votants di Gea al referendum, sche lura vegn la lescha da taxas da bul midada, sco quai ch’il Cussegl federal e parlament han decis. Sch’ils comité da referendum ha success, lura resti sco fin qua.

La sanestra che ha lantschà il referendum cunter abolir las taxas da bul, na survegn nagin sustegn dad autras partidas en questa chaussa: Partidas dal center e da la dretga van perina cun il Cussegl federal e vulessan abolir las taxas.

Ils 13 da favrer decida la Svizra en tut davart quatter fatschentas.

Dossier online

Avrir la box Serrar la box

Sin in clic tut quai ch'igl è da savair avant che votar: rtr.ch/votaziuns

RTR votaziuns 2022

Artitgels legids il pli savens