Siglir tar il cuntegn

Header

cuntegn

Per tge vai? Iniziativa 99%

Ils 26 da settember decida la Svizra davart l'iniziativa dal pievel «distgargiar ils salaris, imponer taglias gistas sin il chapital», pli enconuschent sut il num «iniziativa 99%». L'iniziativa è vegnida lantschada dals Giuvens socialists.

L'iniziativa 99% vul augmentar la taglia per il pli aut pertschient. Tgi che viva sulettamain da sia facultad duai pajar dapli taglia, che quels che van mintga di a lavurar.

En l'avegnir duai la taglia sin entradas ord chapital (per exempel entras tschains u dividendas) crescher. Concret duain entradas or dal chapital vegnir suttamessas ad ina taxaziun pli auta - pli precis cun il factur dad 1,5 cumpareglià cun la taxaziun normala. Quai cun excepziun dad ina tscherta summa libra, ils iniziants proponan 100'000 francs. Ils daners proponan ils Giuvens socialists da duvrar per pajas pli bassas e per il bainstar social.

L'iniziativa lascha dentant avert la realisaziun concreta: Per l'ina n'èsi betg cler tge entradas concretas che vegnan suttamessas a la taxaziun pli auta e per l'autra n'èsi betg cler a tgi e co ch'il stadi duess reparter las entradas supplementaras. Tar in Gea decida il parlament federal quests detagls.

Il Cussegl federal ed il parlament èn s'exprimids cunter l'iniziativa. Tar las partidas sa mussa in foss tranter la sanestra e la dretga: Be la PS e la Verda sustegnan l'iniziativa dals Giuens socialists.

Dossier online

Avrir la box Serrar la box
Dossier online

Sin in clic tut las fatschentas federalas, chantunalas e communalas: rtr.ch/votaziuns

RTR votaziuns 2021

Artitgels legids il pli savens

Scrollar a sanestra Scrollar a dretga